Sabbesaṁ upapajjantānaṁ pavatte maggavippayuttacittassa uppādakkhaṇe tesaṁ tattha maggasaccaṁ nuppajjati, no ca tesaṁ tattha dukkhasaccaṁ nuppajjati. Sabbesaṁ cavantānaṁ pavatte cittassa bhaṅgakkhaṇe arūpe phalassa uppādakkhaṇe tesaṁ tattha maggasaccañca nuppajjati dukkhasaccañca nuppajjati. Yassa yattha samudayasaccaṁ nuppajjati tassa tattha maggasaccaṁ nuppajjatīti? Maggassa uppādakkhaṇe tesaṁ tattha samudayasaccaṁ nuppajjati, no ca tesaṁ tattha maggasaccaṁ nuppajjati. Sabbesaṁ cittassa bhaṅgakkhaṇe taṇhāvippayuttamaggavippayuttacittassa uppādakkhaṇe asaññasattānaṁ tesaṁ tattha samudayasaccañca nuppajjati maggasaccañca nuppajjati. Yassa vā pana yattha maggasaccaṁ nuppajjati tassa tattha samudayasaccaṁ nuppajjatīti? Taṇhāya uppādakkhaṇe tesaṁ tattha maggasaccaṁ nuppajjati, no ca tesaṁ tattha samudayasaccaṁ nuppajjati. Sabbesaṁ cittassa bhaṅgakkhaṇe maggavippayuttataṇhāvippayuttacittassa uppādakkhaṇe asaññasattānaṁ tesaṁ tattha maggasaccañca nuppajjati samudayasaccañca nuppajjati. 5.2.1.2. Atītavāra 5.2.1.2.1. Anulomapuggala Yassa dukkhasaccaṁ uppajjittha tassa samudayasaccaṁ uppajjitthāti? Āmantā. Yassa vā pana samudayasaccaṁ uppajjittha tassa dukkhasaccaṁ uppajjitthāti? Āmantā. Yassa dukkhasaccaṁ uppajjittha tassa maggasaccaṁ uppajjitthāti?