Arūpe tattha vedanākkhandho nirujjhissati, no ca tattha rūpakkhandho nirujjhissati. Pañcavokāre tattha vedanākkhandho ca nirujjhissati rūpakkhandho ca nirujjhissati. 2.2.2.3.3. Anulomapuggalokāsa Yassa yattha rūpakkhandho nirujjhissati tassa tattha vedanākkhandho nirujjhissatīti? Asaññasattānaṁ tesaṁ tattha rūpakkhandho nirujjhissati, no ca tesaṁ tattha vedanākkhandho nirujjhissati. Pañcavokārānaṁ tesaṁ tattha rūpakkhandho ca nirujjhissati vedanākkhandho ca nirujjhissati. Yassa vā pana yattha vedanākkhandho nirujjhissati tassa tattha rūpakkhandho nirujjhissatīti? Arūpānaṁ tesaṁ tattha vedanākkhandho nirujjhissati, no ca tesaṁ tattha rūpakkhandho nirujjhissati. Pañcavokārānaṁ tesaṁ tattha vedanākkhandho ca nirujjhissati rūpakkhandho ca nirujjhissati. 2.2.2.3.4. Paccanīkapuggala Yassa rūpakkhandho na nirujjhissati tassa vedanākkhandho na nirujjhissatīti? Pacchimabhavikānaṁ arūpaṁ upapajjantānaṁ ye ca arūpaṁ upapajjitvā parinibbāyissanti tesaṁ cavantānaṁ tesaṁ rūpakkhandho na nirujjhissati, no ca tesaṁ vedanākkhandho na nirujjhissati. Parinibbantānaṁ tesaṁ rūpakkhandho ca na nirujjhissati vedanākkhandho ca na nirujjhissati. Yassa vā pana vedanākkhandho na nirujjhissati tassa rūpakkhandho na nirujjhissatīti? Āmantā. 2.2.2.3.5. Paccanīkaokāsa Yattha rūpakkhandho na nirujjhissati tattha vedanākkhandho na nirujjhissatīti? Nirujjhissati. Yattha vā pana vedanākkhandho na nirujjhissati tattha rūpakkhandho na nirujjhissatīti? Nirujjhissati. 2.2.2.3.6. Paccanīkapuggalokāsa