Yassa vā pana yattha dhammāyatanaṁ uppajjittha tassa tattha manāyatanaṁ uppajjatīti? Sabbesaṁ cavantānaṁ acittakānaṁ upapajjantānaṁ tesaṁ tattha dhammāyatanaṁ uppajjittha, no ca tesaṁ tattha manāyatanaṁ uppajjati. Sacittakānaṁ upapajjantānaṁ tesaṁ tattha dhammāyatanañca uppajjittha manāyatanañca uppajjati. (Manāyatanamūlakaṁ.) 3.2.1.4.4. Paccanīkapuggala Yassa cakkhāyatanaṁ nuppajjati tassa sotāyatanaṁ nuppajjitthāti? Uppajjittha. Yassa vā pana sotāyatanaṁ nuppajjittha tassa cakkhāyatanaṁ nuppajjatīti? Natthi. Yassa cakkhāyatanaṁ nuppajjati tassa ghānāyatanaṁ …pe… rūpāyatanaṁ … manāyatanaṁ … dhammāyatanaṁ nuppajjitthāti? Uppajjittha. Yassa vā pana dhammāyatanaṁ nuppajjittha tassa cakkhāyatanaṁ nuppajjatīti? Natthi. Yassa ghānāyatanaṁ …pe… rūpāyatanaṁ … manāyatanaṁ nuppajjati tassa dhammāyatanaṁ nuppajjitthāti? Uppajjittha. Yassa vā pana dhammāyatanaṁ nuppajjittha tassa manāyatanaṁ nuppajjatīti? Natthi. 3.2.1.4.5. Paccanīkaokāsa Yattha cakkhāyatanaṁ nuppajjati …pe…. 3.2.1.4.6. Paccanīkapuggalokāsa Yassa yattha cakkhāyatanaṁ nuppajjati tassa tattha sotāyatanaṁ nuppajjitthāti? Pañcavokārā cavantānaṁ acakkhukānaṁ kāmāvacaraṁ upapajjantānaṁ tesaṁ tattha cakkhāyatanaṁ nuppajjati, no ca tesaṁ tattha sotāyatanaṁ nuppajjittha. Suddhāvāse parinibbantānaṁ asaññasattānaṁ arūpānaṁ tesaṁ tattha cakkhāyatanañca nuppajjati sotāyatanañca nuppajjittha.