Anāgāmimaggasamaṅgī vicikicchānusayaṁ na parijānāti, no ca so paṭighānusayaṁ na parijānāti. Anāgāmimaggasamaṅgiñca aṭṭhamakañca ṭhapetvā avasesā puggalā vicikicchānusayañca na parijānanti paṭighānusayañca na parijānanti. Yo paṭighānusayaṁ na parijānāti so bhavarāgānusayaṁ …pe… avijjānusayaṁ na parijānātīti? Aggamaggasamaṅgī paṭighānusayaṁ na parijānāti, no ca so avijjānusayaṁ na parijānāti. Dvinnaṁ maggasamaṅgīnaṁ ṭhapetvā avasesā puggalā paṭighānusayañca na parijānanti avijjānusayañca na parijānanti. Yo vā pana avijjānusayaṁ na parijānāti so paṭighānusayaṁ na parijānātīti? Anāgāmimaggasamaṅgī avijjānusayaṁ na parijānāti, no ca so paṭighānusayaṁ na parijānāti. Dvinnaṁ maggasamaṅgīnaṁ ṭhapetvā avasesā puggalā avijjānusayañca na parijānanti paṭighānusayañca na parijānanti. Yo mānānusayaṁ na parijānāti so diṭṭhānusayaṁ …pe… vicikicchānusayaṁ na parijānātīti? Aṭṭhamako mānānusayaṁ na parijānāti, no ca so vicikicchānusayaṁ na parijānāti. Aggamaggasamaṅgiñca aṭṭhamakañca ṭhapetvā avasesā puggalā mānānusayañca na parijānanti vicikicchānusayañca na parijānanti. Yo vā pana vicikicchānusayaṁ na parijānāti so mānānusayaṁ na parijānātīti? Aggamaggasamaṅgī vicikicchānusayaṁ na parijānāti, no ca so mānānusayaṁ na parijānāti. Aggamaggasamaṅgiñca aṭṭhamakañca ṭhapetvā avasesā puggalā vicikicchānusayañca na parijānanti mānānusayañca na parijānanti. Yo mānānusayaṁ na parijānāti so bhavarāgānusayaṁ …pe… avijjānusayaṁ na parijānātīti? Āmantā.