Aggamaggasamaṅgī kāmadhātuyā dvīsu vedanāsu rūpadhātuyā arūpadhātuyā so tato vicikicchānusayaṁ na parijānāti, no ca so tato mānānusayaṁ na parijānāti. Sveva puggalo dukkhāya vedanāya apariyāpanne so tato vicikicchānusayañca na parijānāti mānānusayañca na parijānāti. Aggamaggasamaṅgiñca aṭṭhamakañca ṭhapetvā avasesā puggalā sabbattha vicikicchānusayañca na parijānanti mānānusayañca na parijānanti. Yo yato mānānusayaṁ na parijānāti so tato bhavarāgānusayaṁ na parijānātīti? Āmantā. Yo vā pana yato bhavarāgānusayaṁ na parijānāti so tato mānānusayaṁ na parijānātīti? Aggamaggasamaṅgī kāmadhātuyā dvīsu vedanāsu so tato bhavarāgānusayaṁ na parijānāti, no ca so tato mānānusayaṁ na parijānāti. Sveva puggalo dukkhāya vedanāya apariyāpanne so tato bhavarāgānusayañca na parijānāti mānānusayañca na parijānāti. Aggamaggasamaṅgiṁ ṭhapetvā avasesā puggalā sabbattha bhavarāgānusayañca na parijānanti mānānusayañca na parijānanti. Yo yato mānānusayaṁ na parijānāti so tato avijjānusayaṁ na parijānātīti? Aggamaggasamaṅgī dukkhāya vedanāya so tato mānānusayaṁ na parijānāti, no ca so tato avijjānusayaṁ na parijānāti. Sveva puggalo apariyāpanne so tato mānānusayañca na parijānāti avijjānusayañca na parijānāti. Aggamaggasamaṅgiṁ ṭhapetvā avasesā puggalā sabbattha mānānusayañca na parijānanti avijjānusayañca na parijānanti. Yo vā pana yato avijjānusayaṁ na parijānāti so tato mānānusayaṁ na parijānātīti? Āmantā.