Yassa rūpāyatanaṁ nuppajjati tassa manāyatanaṁ …pe… dhammāyatanaṁ nuppajjissatīti? Sabbesaṁ cavantānaṁ arūpakānaṁ upapajjantānaṁ tesaṁ rūpāyatanaṁ nuppajjati, no ca tesaṁ dhammāyatanaṁ nuppajjissati. Pañcavokāre parinibbantānaṁ arūpe pacchimabhavikānaṁ tesaṁ rūpāyatanañca nuppajjati dhammāyatanañca nuppajjissati. Yassa vā pana dhammāyatanaṁ nuppajjissati tassa rūpāyatanaṁ nuppajjatīti? Pacchimabhavikānaṁ pañcavokāraṁ upapajjantānaṁ tesaṁ dhammāyatanaṁ nuppajjissati, no ca tesaṁ rūpāyatanaṁ nuppajjati. Pañcavokāre parinibbantānaṁ arūpe pacchimabhavikānaṁ tesaṁ dhammāyatanañca nuppajjissati rūpāyatanañca nuppajjati. (Rūpāyatanamūlakaṁ.) Yassa manāyatanaṁ nuppajjati tassa dhammāyatanaṁ nuppajjissatīti? Sabbesaṁ cavantānaṁ acittakānaṁ upapajjantānaṁ tesaṁ manāyatanaṁ nuppajjati, no ca tesaṁ dhammāyatanaṁ nuppajjissati. Parinibbantānaṁ tesaṁ manāyatanañca nuppajjati dhammāyatanañca nuppajjissati. Yassa vā pana dhammāyatanaṁ nuppajjissati tassa manāyatanaṁ nuppajjatīti? Pacchimabhavikānaṁ upapajjantānaṁ tesaṁ dhammāyatanaṁ nuppajjissati, no ca tesaṁ manāyatanaṁ nuppajjati. Parinibbantānaṁ tesaṁ dhammāyatanañca nuppajjissati manāyatanañca nuppajjati. (Manāyatanamūlakaṁ.) 3.2.1.5.5. Paccanīkaokāsa Yattha cakkhāyatanaṁ nuppajjati …pe…. 3.2.1.5.6. Paccanīkapuggalokāsa Yassa yattha cakkhāyatanaṁ nuppajjati tassa tattha sotāyatanaṁ nuppajjissatīti?