Yassa samudayasaccaṁ uppajjittha tassa maggasaccaṁ uppajjissatīti? Aggamaggasamaṅgīnaṁ arahantānaṁ ye ca puthujjanā maggaṁ na paṭilabhissanti tesaṁ samudayasaccaṁ uppajjittha, no ca tesaṁ maggasaccaṁ uppajjissati. Yassa cittassa anantarā aggamaggaṁ paṭilabhissanti, ye caññe maggaṁ paṭilabhissanti tesaṁ samudayasaccañca uppajjittha maggasaccañca uppajjissati. Yassa vā pana …pe… ? Āmantā. 5.2.1.6.2. Anulomaokāsa Yattha dukkhasaccaṁ uppajjittha …pe…. 5.2.1.6.3. Anulomapuggalokāsa Yassa yattha dukkhasaccaṁ uppajjittha tassa tattha samudayasaccaṁ uppajjissatīti? Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti asaññasattānaṁ tesaṁ tattha dukkhasaccaṁ uppajjittha, no ca tesaṁ tattha samudayasaccaṁ uppajjissati. Itaresaṁ catuvokārānaṁ pañcavokārānaṁ tesaṁ tattha dukkhasaccañca uppajjittha samudayasaccañca uppajjissati. Yassa vā pana yattha samudayasaccaṁ uppajjissati tassa tattha dukkhasaccaṁ uppajjitthāti? Suddhāvāsaṁ upapajjantānaṁ tesaṁ tattha samudayasaccaṁ uppajjissati, no ca tesaṁ tattha dukkhasaccaṁ uppajjittha. Itaresaṁ catuvokārānaṁ pañcavokārānaṁ tesaṁ tattha samudayasaccañca uppajjissati dukkhasaccañca uppajjittha. Yassa yattha dukkhasaccaṁ uppajjittha tassa tattha maggasaccaṁ uppajjissatīti?