Pacchimabhavikānaṁ pañcavokāraṁ upapajjantānaṁ tesaṁ tattha sotāyatanaṁ nirujjhissati, no ca tesaṁ tattha cakkhāyatanaṁ uppajjissati. Itaresaṁ pañcavokārānaṁ tesaṁ tattha sotāyatanañca nirujjhissati cakkhāyatanañca uppajjissati. Yassa yattha cakkhāyatanaṁ uppajjissati tassa tattha ghānāyatanaṁ nirujjhissatīti? Rūpāvacarānaṁ tesaṁ tattha cakkhāyatanaṁ uppajjissati, no ca tesaṁ tattha ghānāyatanaṁ nirujjhissati. Kāmāvacarānaṁ tesaṁ tattha cakkhāyatanañca uppajjissati ghānāyatanañca nirujjhissati. Yassa vā pana yattha ghānāyatanaṁ nirujjhissati tassa tattha cakkhāyatanaṁ uppajjissatīti? Pacchimabhavikānaṁ kāmāvacaraṁ upapajjantānaṁ tesaṁ tattha ghānāyatanaṁ nirujjhissati, no ca tesaṁ tattha cakkhāyatanaṁ uppajjissati. Itaresaṁ kāmāvacarānaṁ tesaṁ tattha ghānāyatanañca nirujjhissati cakkhāyatanañca uppajjissati. Yassa yattha cakkhāyatanaṁ uppajjissati tassa tattha rūpāyatanaṁ nirujjhissatīti? Āmantā. Yassa vā pana yattha rūpāyatanaṁ nirujjhissati tassa tattha cakkhāyatanaṁ uppajjissatīti? Pacchimabhavikānaṁ pañcavokāraṁ upapajjantānaṁ asaññasattānaṁ tesaṁ tattha rūpāyatanaṁ nirujjhissati, no ca tesaṁ tattha cakkhāyatanaṁ uppajjissati. Itaresaṁ pañcavokārānaṁ tesaṁ tattha rūpāyatanañca nirujjhissati cakkhāyatanañca uppajjissati. Yassa yattha cakkhāyatanaṁ uppajjissati tassa tattha manāyatanaṁ nirujjhissatīti? Āmantā.