Yassa vā pana vedanākkhandho nuppajjissati tassa rūpakkhandho nuppajjissatīti? Āmantā. 2.2.1.3.5. Paccanīkaokāsa Yattha rūpakkhandho nuppajjissati tattha vedanākkhandho nuppajjissatīti? Uppajjissati. Yattha vā pana vedanākkhandho nuppajjissati tattha rūpakkhandho nuppajjissatīti? Uppajjissati. 2.2.1.3.6. Paccanīkapuggalokāsa Yassa yattha rūpakkhandho nuppajjissati tassa tattha vedanākkhandho nuppajjissatīti? Arūpānaṁ tesaṁ tattha rūpakkhandho nuppajjissati, no ca tesaṁ tattha vedanākkhandho nuppajjissati. Pacchimabhavikānaṁ tesaṁ tattha rūpakkhandho ca nuppajjissati vedanākkhandho ca nuppajjissati. Yassa vā pana yattha vedanākkhandho nuppajjissati tassa tattha rūpakkhandho nuppajjissatīti? Asaññasattānaṁ tesaṁ tattha vedanākkhandho nuppajjissati, no ca tesaṁ tattha rūpakkhandho nuppajjissati. Pacchimabhavikānaṁ tesaṁ tattha vedanākkhandho ca nuppajjissati rūpakkhandho ca nuppajjissati. 2.2.1.4. Paccuppannātītavāra 2.2.1.4.1. Anulomapuggala Yassa rūpakkhandho uppajjati tassa vedanākkhandho uppajjitthāti? Āmantā. Yassa vā pana vedanākkhandho uppajjittha tassa rūpakkhandho uppajjatīti? Sabbesaṁ cavantānaṁ arūpaṁ upapajjantānaṁ tesaṁ vedanākkhandho uppajjittha, no ca tesaṁ rūpakkhandho uppajjati. Pañcavokāraṁ upapajjantānaṁ asaññasattaṁ upapajjantānaṁ tesaṁ vedanākkhandho ca uppajjittha rūpakkhandho ca uppajjati.