Sabbesaṁ upapajjantānaṁ pavatte maggavippayuttacittassa uppādakkhaṇe tesaṁ dukkhasaccaṁ uppajjati, no ca tesaṁ maggasaccaṁ uppajjati. Pañcavokāre maggassa uppādakkhaṇe tesaṁ dukkhasaccañca uppajjati maggasaccañca uppajjati. Yassa vā pana maggasaccaṁ uppajjati tassa dukkhasaccaṁ uppajjatīti? Arūpe maggassa uppādakkhaṇe tesaṁ maggasaccaṁ uppajjati, no ca tesaṁ dukkhasaccaṁ uppajjati. Pañcavokāre maggassa uppādakkhaṇe tesaṁ maggasaccañca uppajjati dukkhasaccañca uppajjati. Yassa samudayasaccaṁ uppajjati tassa maggasaccaṁ uppajjatīti? No. Yassa vā pana maggasaccaṁ uppajjati tassa samudayasaccaṁ uppajjatīti? No. 5.2.1.1.2. Anulomaokāsa Yattha dukkhasaccaṁ uppajjati tattha samudayasaccaṁ uppajjatīti? Asaññasatte tattha dukkhasaccaṁ uppajjati, no ca tattha samudayasaccaṁ uppajjati. Catuvokāre pañcavokāre tattha dukkhasaccañca uppajjati samudayasaccañca uppajjati. Yattha vā pana …pe… ? Āmantā. Yattha dukkhasaccaṁ uppajjati tattha maggasaccaṁ uppajjatīti? Apāye asaññasatte tattha dukkhasaccaṁ uppajjati, no ca tattha maggasaccaṁ uppajjati. Avasese catuvokāre pañcavokāre tattha dukkhasaccañca uppajjati maggasaccañca uppajjati.