Suddhāvāsaṁ upapajjantānaṁ arūpānaṁ tesaṁ tattha dhammāyatanaṁ nirujjhissati, no ca tesaṁ tattha rūpāyatanaṁ nirujjhittha. Itaresaṁ pañcavokārānaṁ asaññasattānaṁ tesaṁ tattha dhammāyatanañca nirujjhissati rūpāyatanañca nirujjhittha. (Rūpāyatanamūlakaṁ.) Yassa yattha manāyatanaṁ nirujjhittha tassa tattha dhammāyatanaṁ nirujjhissatīti? Parinibbantānaṁ tesaṁ tattha manāyatanaṁ nirujjhittha, no ca tesaṁ tattha dhammāyatanaṁ nirujjhissati. Itaresaṁ catuvokārānaṁ pañcavokārānaṁ tesaṁ tattha manāyatanañca nirujjhittha dhammāyatanañca nirujjhissati. Yassa vā pana yattha dhammāyatanaṁ nirujjhissati tassa tattha manāyatanaṁ nirujjhitthāti? Suddhāvāsaṁ upapajjantānaṁ asaññasattānaṁ tesaṁ tattha dhammāyatanaṁ nirujjhissati, no ca tesaṁ tattha manāyatanaṁ nirujjhittha. Itaresaṁ catuvokārānaṁ pañcavokārānaṁ tesaṁ tattha dhammāyatanañca nirujjhissati manāyatanañca nirujjhittha. 3.2.2.6.4. Paccanīkapuggala Yassa cakkhāyatanaṁ na nirujjhittha tassa sotāyatanaṁ na nirujjhissatīti? Natthi. Yassa vā pana sotāyatanaṁ na nirujjhissati tassa cakkhāyatanaṁ na nirujjhitthāti? Nirujjhittha. Yassa cakkhāyatanaṁ …pe… ghānāyatanaṁ … rūpāyatanaṁ … manāyatanaṁ na nirujjhittha tassa dhammāyatanaṁ na nirujjhissatīti? Natthi. Yassa vā pana dhammāyatanaṁ na nirujjhissati tassa manāyatanaṁ na nirujjhitthāti? Nirujjhittha. 3.2.2.6.5. Paccanīkaokāsa