Yassa vedanākkhandho uppajjissati tassa saññākkhandho nirujjhissatīti? Āmantā. Yassa vā pana saññākkhandho nirujjhissati tassa vedanākkhandho uppajjissatīti? Pacchimabhavikānaṁ upapajjantānaṁ tesaṁ saññākkhandho nirujjhissati, no ca tesaṁ vedanākkhandho uppajjissati. Itaresaṁ tesaṁ saññākkhandho ca nirujjhissati vedanākkhandho ca uppajjissati. 2.2.3.3.2. Anulomaokāsa Yattha rūpakkhandho uppajjissati …pe…. 2.2.3.3.3. Anulomapuggalokāsa Yassa yattha rūpakkhandho uppajjissati tassa tattha vedanākkhandho nirujjhissatīti? Asaññasattānaṁ tesaṁ tattha rūpakkhandho uppajjissati, no ca tesaṁ tattha vedanākkhandho nirujjhissati. Pañcavokārānaṁ tesaṁ tattha rūpakkhandho ca uppajjissati vedanākkhandho ca nirujjhissati. Yassa vā pana yattha vedanākkhandho nirujjhissati tassa tattha rūpakkhandho uppajjissatīti? Pacchimabhavikānaṁ pañcavokāraṁ upapajjantānaṁ arūpānaṁ tesaṁ tattha vedanākkhandho nirujjhissati, no ca tesaṁ tattha rūpakkhandho uppajjissati. Itaresaṁ pañcavokārānaṁ tesaṁ tattha vedanākkhandho ca nirujjhissati rūpakkhandho ca uppajjissati. Yassa yattha vedanākkhandho uppajjissati tassa tattha saññākkhandho nirujjhissatīti? Āmantā. Yassa vā pana yattha saññākkhandho nirujjhissati tassa tattha vedanākkhandho uppajjissatīti?