Pacchimabhavikānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha ghānāyatanaṁ nuppajjissati, no ca tesaṁ tattha dhammāyatanaṁ na nirujjhissati. Parinibbantānaṁ tesaṁ tattha ghānāyatanañca nuppajjissati dhammāyatanañca na nirujjhissati. Yassa vā pana yattha …pe… ? Āmantā. (Ghānāyatanamūlakaṁ.) Yassa yattha rūpāyatanaṁ nuppajjissati tassa tattha manāyatanaṁ na nirujjhissatīti? Pacchimabhavikānaṁ pañcavokāraṁ upapajjantānaṁ arūpānaṁ tesaṁ tattha rūpāyatanaṁ nuppajjissati, no ca tesaṁ tattha manāyatanaṁ na nirujjhissati. Parinibbantānaṁ tesaṁ tattha rūpāyatanañca nuppajjissati manāyatanañca na nirujjhissati. Yassa vā pana yattha manāyatanaṁ na nirujjhissati tassa tattha rūpāyatanaṁ nuppajjissatīti? Asaññasattānaṁ tesaṁ tattha manāyatanaṁ na nirujjhissati, no ca tesaṁ tattha rūpāyatanaṁ nuppajjissati. Parinibbantānaṁ tesaṁ tattha manāyatanañca na nirujjhissati rūpāyatanañca nuppajjissati. Yassa yattha rūpāyatanaṁ nuppajjissati tassa tattha dhammāyatanaṁ na nirujjhissatīti? Pacchimabhavikānaṁ pañcavokāraṁ upapajjantānaṁ arūpānaṁ tesaṁ tattha rūpāyatanaṁ nuppajjissati, no ca tesaṁ tattha dhammāyatanaṁ na nirujjhissati. Parinibbantānaṁ tesaṁ tattha rūpāyatanañca nuppajjissati dhammāyatanañca na nirujjhissati. Yassa vā pana yattha …pe… ? Āmantā. (Rūpāyatanamūlakaṁ.)