Yassa yattha dukkhasaccaṁ uppajjati tassa tattha samudayasaccaṁ uppajjissatīti? Aggamaggassa uppādakkhaṇe arahantānaṁ cittassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe asaññasattaṁ upapajjantānaṁ tesaṁ tattha dukkhasaccaṁ uppajjati, no ca tesaṁ tattha samudayasaccaṁ uppajjissati. Itaresaṁ catuvokāraṁ pañcavokāraṁ upapajjantānaṁ pavatte cittassa uppādakkhaṇe tesaṁ tattha dukkhasaccañca uppajjati samudayasaccañca uppajjissati. Yassa vā pana yattha samudayasaccaṁ uppajjissati tassa tattha dukkhasaccaṁ uppajjatīti? Catuvokārā pañcavokārā cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ tattha samudayasaccaṁ uppajjissati, no ca tesaṁ tattha dukkhasaccaṁ uppajjati. Catuvokāraṁ pañcavokāraṁ upapajjantānaṁ pavatte cittassa uppādakkhaṇe tesaṁ tattha samudayasaccañca uppajjissati dukkhasaccañca uppajjati. Yassa yattha dukkhasaccaṁ uppajjati tassa tattha maggasaccaṁ uppajjissatīti?