Parinibbantānaṁ tesaṁ manāyatanaṁ nirujjhittha, no ca tesaṁ dhammāyatanaṁ nirujjhissati. Itaresaṁ tesaṁ manāyatanañca nirujjhittha dhammāyatanañca nirujjhissati. Yassa vā pana …pe… ? Āmantā. 3.2.2.6.2. Anulomaokāsa Yattha cakkhāyatanaṁ nirujjhittha …pe…. 3.2.2.6.3. Anulomapuggalokāsa Yassa yattha cakkhāyatanaṁ nirujjhittha tassa tattha sotāyatanaṁ nirujjhissatīti? Pañcavokāre parinibbantānaṁ tesaṁ tattha cakkhāyatanaṁ nirujjhittha, no ca tesaṁ tattha sotāyatanaṁ nirujjhissati. Itaresaṁ pañcavokārānaṁ tesaṁ tattha cakkhāyatanañca nirujjhittha sotāyatanañca nirujjhissati. Yassa vā pana yattha sotāyatanaṁ nirujjhissati tassa tattha cakkhāyatanaṁ nirujjhitthāti? Suddhāvāsaṁ upapajjantānaṁ tesaṁ tattha sotāyatanaṁ nirujjhissati, no ca tesaṁ tattha cakkhāyatanaṁ nirujjhittha. Itaresaṁ pañcavokārānaṁ tesaṁ tattha sotāyatanañca nirujjhissati cakkhāyatanañca nirujjhittha. Yassa yattha cakkhāyatanaṁ nirujjhittha tassa tattha ghānāyatanaṁ nirujjhissatīti? Kāmāvacare parinibbantānaṁ rūpāvacarānaṁ tesaṁ tattha cakkhāyatanaṁ nirujjhittha, no ca tesaṁ tattha ghānāyatanaṁ nirujjhissati. Itaresaṁ kāmāvacarānaṁ tesaṁ tattha cakkhāyatanañca nirujjhittha ghānāyatanañca nirujjhissati. Yassa vā pana yattha ghānāyatanaṁ nirujjhissati tassa tattha cakkhāyatanaṁ nirujjhitthāti? Āmantā.