Dutiyajjhānaṁ tatiyajjhānaṁ samāpannānaṁ assāsapassāsānaṁ bhaṅgakkhaṇe tesaṁ tattha kāyasaṅkhāro nirujjhati, no ca tesaṁ tattha vacīsaṅkhāro nirujjhissati. Paṭhamajjhānaṁ samāpannānaṁ kāmāvacarānaṁ assāsapassāsānaṁ bhaṅgakkhaṇe tesaṁ tattha kāyasaṅkhāro ca nirujjhati vacīsaṅkhāro ca nirujjhissati. Yassa vā pana yattha vacīsaṅkhāro nirujjhissati tassa tattha kāyasaṅkhāro nirujjhatīti? Paṭhamajjhānaṁ samāpannānaṁ kāmāvacarānaṁ assāsapassāsānaṁ uppādakkhaṇe tesaṁyeva vinā assāsapassāsehi cittassa bhaṅgakkhaṇe rūpāvacarānaṁ arūpāvacarānaṁ tesaṁ tattha vacīsaṅkhāro nirujjhissati, no ca tesaṁ tattha kāyasaṅkhāro nirujjhati. Paṭhamajjhānaṁ samāpannānaṁ kāmāvacarānaṁ assāsapassāsānaṁ bhaṅgakkhaṇe tesaṁ tattha vacīsaṅkhāro ca nirujjhissati kāyasaṅkhāro ca nirujjhati. Yassa yattha kāyasaṅkhāro nirujjhati tassa tattha cittasaṅkhāro nirujjhissatīti? Āmantā. Yassa vā pana yattha cittasaṅkhāro nirujjhissati tassa tattha kāyasaṅkhāro nirujjhatīti? Sabbesaṁ cittassa uppādakkhaṇe vinā assāsapassāsehi cittassa bhaṅgakkhaṇe tesaṁ tattha cittasaṅkhāro nirujjhissati, no ca tesaṁ tattha kāyasaṅkhāro nirujjhati. Assāsapassāsānaṁ bhaṅgakkhaṇe tesaṁ tattha cittasaṅkhāro ca nirujjhissati kāyasaṅkhāro ca nirujjhati. Yassa yattha vacīsaṅkhāro nirujjhati tassa tattha cittasaṅkhāro nirujjhissatīti? Savitakkasavicārapacchimacittassa bhaṅgakkhaṇe tesaṁ tattha vacīsaṅkhāro nirujjhati, no ca tesaṁ tattha cittasaṅkhāro nirujjhissati. Itaresaṁ vitakkavicārānaṁ bhaṅgakkhaṇe tesaṁ tattha vacīsaṅkhāro ca nirujjhati cittasaṅkhāro ca nirujjhissati.