Acakkhukānaṁ cavantānaṁ tesaṁ dhammāyatanaṁ nirujjhati, no ca tesaṁ cakkhāyatanaṁ nirujjhati. Sacakkhukānaṁ cavantānaṁ tesaṁ dhammāyatanañca nirujjhati cakkhāyatanañca nirujjhati. (Cakkhāyatanamūlakaṁ.) Yassa ghānāyatanaṁ nirujjhati tassa rūpāyatanaṁ nirujjhatīti? Āmantā. Yassa vā pana rūpāyatanaṁ nirujjhati tassa ghānāyatanaṁ nirujjhatīti? Sarūpakānaṁ aghānakānaṁ cavantānaṁ tesaṁ rūpāyatanaṁ nirujjhati, no ca tesaṁ ghānāyatanaṁ nirujjhati. Saghānakānaṁ cavantānaṁ tesaṁ rūpāyatanañca nirujjhati ghānāyatanañca nirujjhati. Yassa ghānāyatanaṁ nirujjhati tassa manāyatanaṁ nirujjhatīti? Āmantā. Yassa vā pana manāyatanaṁ nirujjhati tassa ghānāyatanaṁ nirujjhatīti? Sacittakānaṁ aghānakānaṁ cavantānaṁ tesaṁ manāyatanaṁ nirujjhati, no ca tesaṁ ghānāyatanaṁ nirujjhati. Saghānakānaṁ cavantānaṁ tesaṁ manāyatanañca nirujjhati ghānāyatanañca nirujjhati. Yassa ghānāyatanaṁ nirujjhati tassa dhammāyatanaṁ nirujjhatīti? Āmantā. Yassa vā pana dhammāyatanaṁ nirujjhati tassa ghānāyatanaṁ nirujjhatīti? Aghānakānaṁ cavantānaṁ tesaṁ dhammāyatanaṁ nirujjhati, no ca tesaṁ ghānāyatanaṁ nirujjhati. Saghānakānaṁ cavantānaṁ tesaṁ dhammāyatanañca nirujjhati ghānāyatanañca nirujjhati. (Ghānāyatanamūlakaṁ.) Yassa rūpāyatanaṁ nirujjhati tassa manāyatanaṁ nirujjhatīti?