Yo vā pana avijjānusayaṁ na parijānāti so mānānusayaṁ na parijānātīti? Āmantā. Yo diṭṭhānusayaṁ na parijānāti so vicikicchānusayaṁ na parijānātīti? Āmantā. Yo vā pana vicikicchānusayaṁ na parijānāti so diṭṭhānusayaṁ na parijānātīti? Āmantā …pe…. Yo vicikicchānusayaṁ na parijānāti so bhavarāgānusayaṁ …pe… avijjānusayaṁ na parijānātīti? Aggamaggasamaṅgī vicikicchānusayaṁ na parijānāti, no ca so avijjānusayaṁ na parijānāti. Aggamaggasamaṅgiñca aṭṭhamakañca ṭhapetvā avasesā puggalā vicikicchānusayañca na parijānanti avijjānusayañca na parijānanti. Yo vā pana avijjānusayaṁ na parijānāti so vicikicchānusayaṁ na parijānātīti? Aṭṭhamako avijjānusayaṁ na parijānāti, no ca so vicikicchānusayaṁ na parijānāti. Aggamaggasamaṅgiñca aṭṭhamakañca ṭhapetvā avasesā puggalā avijjānusayañca na parijānanti vicikicchānusayañca na parijānanti. Yo bhavarāgānusayaṁ na parijānāti so avijjānusayaṁ na parijānātīti? Āmantā. Yo vā pana avijjānusayaṁ na parijānāti so bhavarāgānusayaṁ na parijānātīti? Āmantā. (Ekamūlakaṁ.) Yo kāmarāgānusayañca paṭighānusayañca na parijānāti so mānānusayaṁ na parijānātīti?