Kāmadhātuyā tīsu vedanāsu tato avijjānusayaṁ parijānāti, no ca tato bhavarāgānusayaṁ parijānāti. Rūpadhātuyā arūpadhātuyā tato avijjānusayañca parijānāti bhavarāgānusayañca parijānāti. (Ekamūlakaṁ.) Yato kāmarāgānusayañca paṭighānusayañca parijānāti tato mānānusayaṁ parijānātīti? Natthi. Yato vā pana mānānusayaṁ parijānāti tato kāmarāgānusayañca paṭighānusayañca parijānātīti? Rūpadhātuyā arūpadhātuyā tato mānānusayaṁ parijānāti, no ca tato kāmarāgānusayañca paṭighānusayañca parijānāti. Kāmadhātuyā dvīsu vedanāsu tato mānānusayañca kāmarāgānusayañca parijānāti, no ca tato paṭighānusayaṁ parijānāti. Yato kāmarāgānusayañca paṭighānusayañca parijānāti tato diṭṭhānusayaṁ …pe… vicikicchānusayaṁ parijānātīti? Natthi. Yato vā pana vicikicchānusayaṁ parijānāti tato kāmarāgānusayañca paṭighānusayañca parijānātīti? Rūpadhātuyā arūpadhātuyā tato vicikicchānusayaṁ parijānāti, no ca tato kāmarāgānusayañca paṭighānusayañca parijānāti. Kāmadhātuyā dvīsu vedanāsu tato vicikicchānusayañca kāmarāgānusayañca parijānāti, no ca tato paṭighānusayaṁ parijānāti. Dukkhāya vedanāya tato vicikicchānusayañca paṭighānusayañca parijānāti, no ca tato kāmarāgānusayaṁ parijānāti. Yato kāmarāgānusayañca paṭighānusayañca parijānāti tato bhavarāgānusayaṁ parijānātīti? Natthi. Yato vā pana bhavarāgānusayaṁ parijānāti tato kāmarāgānusayañca paṭighānusayañca parijānātīti? No.