Sabbesaṁ cittassa bhaṅgakkhaṇe vinā assāsapassāsehi cittassa uppādakkhaṇe nirodhasamāpannānaṁ asaññasattānaṁ tesaṁ vacīsaṅkhāro uppajjissati, no ca tesaṁ kāyasaṅkhāro uppajjati. Assāsapassāsānaṁ uppādakkhaṇe tesaṁ vacīsaṅkhāro ca uppajjissati kāyasaṅkhāro ca uppajjati. Yassa kāyasaṅkhāro uppajjati tassa cittasaṅkhāro uppajjissatīti? Āmantā. Yassa vā pana cittasaṅkhāro uppajjissati tassa kāyasaṅkhāro uppajjatīti? Sabbesaṁ cittassa bhaṅgakkhaṇe vinā assāsapassāsehi cittassa uppādakkhaṇe nirodhasamāpannānaṁ asaññasattānaṁ tesaṁ cittasaṅkhāro uppajjissati, no ca tesaṁ kāyasaṅkhāro uppajjati. Assāsapassāsānaṁ uppādakkhaṇe tesaṁ cittasaṅkhāro ca uppajjissati kāyasaṅkhāro ca uppajjati. Yassa vacīsaṅkhāro uppajjati tassa cittasaṅkhāro uppajjissatīti? Savitakkasavicārapacchimacittassa uppādakkhaṇe tesaṁ vacīsaṅkhāro uppajjati, no ca tesaṁ cittasaṅkhāro uppajjissati. Itaresaṁ vitakkavicārānaṁ uppādakkhaṇe tesaṁ vacīsaṅkhāro ca uppajjati cittasaṅkhāro ca uppajjissati. Yassa vā pana cittasaṅkhāro uppajjissati tassa vacīsaṅkhāro uppajjatīti?