Yattha rūpakkhandho nuppajjittha tattha vedanākkhandho nuppajjitthāti? Uppajjittha. Yattha vā pana vedanākkhandho nuppajjittha tattha rūpakkhandho nuppajjitthāti? Uppajjittha. 2.2.1.2.6. Paccanīkapuggalokāsa Yassa yattha rūpakkhandho nuppajjittha tassa tattha vedanākkhandho nuppajjitthāti? Arūpānaṁ tesaṁ tattha rūpakkhandho nuppajjittha, no ca tesaṁ tattha vedanākkhandho nuppajjittha. Suddhāvāsānaṁ tesaṁ tattha rūpakkhandho ca nuppajjittha vedanākkhandho ca nuppajjittha. Yassa vā pana yattha vedanākkhandho nuppajjittha tassa tattha rūpakkhandho nuppajjitthāti? Asaññasattānaṁ tesaṁ tattha vedanākkhandho nuppajjittha, no ca tesaṁ tattha rūpakkhandho nuppajjittha. Suddhāvāsānaṁ tesaṁ tattha vedanākkhandho ca nuppajjittha rūpakkhandho ca nuppajjittha. 2.2.1.3. Anāgatavāra 2.2.1.3.1. Anulomapuggala Yassa rūpakkhandho uppajjissati tassa vedanākkhandho uppajjissatīti? Āmantā. Yassa vā pana vedanākkhandho uppajjissati tassa rūpakkhandho uppajjissatīti? Ye arūpaṁ upapajjitvā parinibbāyissanti tesaṁ vedanākkhandho uppajjissati, no ca tesaṁ rūpakkhandho uppajjissati. Itaresaṁ tesaṁ vedanākkhandho ca uppajjissati rūpakkhandho ca uppajjissati. 2.2.1.3.2. Anulomaokāsa Yattha rūpakkhandho uppajjissati tattha vedanākkhandho uppajjissatīti?