Suddhāvāsaṁ upapajjantānaṁ arūpānaṁ tesaṁ tattha rūpāyatanaṁ na nirujjhittha, no ca tesaṁ tattha manāyatanaṁ na nirujjhissati. Suddhāvāse parinibbantānaṁ arūpe parinibbantānaṁ tesaṁ tattha rūpāyatanañca na nirujjhittha manāyatanañca na nirujjhissati. Yassa vā pana yattha manāyatanaṁ na nirujjhissati tassa tattha rūpāyatanaṁ na nirujjhitthāti? Pañcavokāre parinibbantānaṁ asaññasattānaṁ tesaṁ tattha manāyatanaṁ na nirujjhissati, no ca tesaṁ tattha rūpāyatanaṁ na nirujjhittha. Suddhāvāse parinibbantānaṁ arūpe parinibbantānaṁ tesaṁ tattha manāyatanañca na nirujjhissati rūpāyatanañca na nirujjhittha. Yassa yattha rūpāyatanaṁ na nirujjhittha tassa tattha dhammāyatanaṁ na nirujjhissatīti? Suddhāvāsaṁ upapajjantānaṁ arūpānaṁ tesaṁ tattha rūpāyatanaṁ na nirujjhittha, no ca tesaṁ tattha dhammāyatanaṁ na nirujjhissati. Suddhāvāse parinibbantānaṁ arūpe parinibbantānaṁ tesaṁ tattha rūpāyatanañca na nirujjhittha dhammāyatanañca na nirujjhissati. Yassa vā pana yattha dhammāyatanaṁ na nirujjhissati tassa tattha rūpāyatanaṁ na nirujjhitthāti? Pañcavokāre parinibbantānaṁ tesaṁ tattha dhammāyatanaṁ na nirujjhissati, no ca tesaṁ tattha rūpāyatanaṁ na nirujjhittha. Suddhāvāse parinibbantānaṁ arūpe parinibbantānaṁ tesaṁ tattha dhammāyatanañca na nirujjhissati rūpāyatanañca na nirujjhittha. (Rūpāyatanamūlakaṁ.) Yassa yattha manāyatanaṁ na nirujjhittha tassa tattha dhammāyatanaṁ na nirujjhissatīti?