Yattha vā pana maggasaccaṁ nuppajjati tattha dukkhasaccaṁ nuppajjatīti? Uppajjati. Yattha samudayasaccaṁ nuppajjati tattha maggasaccaṁ nuppajjatīti? Āmantā. Yattha vā pana maggasaccaṁ nuppajjati tattha samudayasaccaṁ nuppajjatīti? Apāye tattha maggasaccaṁ nuppajjati, no ca tattha samudayasaccaṁ nuppajjati. Asaññasatte tattha maggasaccañca nuppajjati samudayasaccañca nuppajjati. 5.2.1.1.6. Paccanīkapuggalokāsa Yassa yattha dukkhasaccaṁ nuppajjati tassa tattha samudayasaccaṁ nuppajjatīti? Āmantā. Yassa vā pana yattha samudayasaccaṁ nuppajjati tassa tattha dukkhasaccaṁ nuppajjatīti? Sabbesaṁ upapajjantānaṁ pavatte taṇhāvippayuttacittassa uppādakkhaṇe tesaṁ tattha samudayasaccaṁ nuppajjati, no ca tesaṁ tattha dukkhasaccaṁ nuppajjati. Sabbesaṁ cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ tattha samudayasaccañca nuppajjati dukkhasaccañca nuppajjati. Yassa yattha dukkhasaccaṁ nuppajjati tassa tattha maggasaccaṁ nuppajjatīti? Arūpe maggassa uppādakkhaṇe tesaṁ tattha dukkhasaccaṁ nuppajjati, no ca tesaṁ tattha maggasaccaṁ nuppajjati. Sabbesaṁ cavantānaṁ pavatte cittassa bhaṅgakkhaṇe arūpe phalassa uppādakkhaṇe tesaṁ tattha dukkhasaccañca nuppajjati maggasaccañca nuppajjati. Yassa vā pana yattha maggasaccaṁ nuppajjati tassa tattha dukkhasaccaṁ nuppajjatīti?
