Yattha rūpakkhandho uppajjati tattha vedanākkhandho uppajjatīti? Asaññasatte tattha rūpakkhandho uppajjati, no ca tattha vedanākkhandho uppajjati. Pañcavokāre tattha rūpakkhandho ca uppajjati vedanākkhandho ca uppajjati. Yattha vā pana vedanākkhandho uppajjati tattha rūpakkhandho uppajjatīti? Arūpe tattha vedanākkhandho uppajjati, no ca tattha rūpakkhandho uppajjati. Pañcavokāre tattha vedanākkhandho ca uppajjati rūpakkhandho ca uppajjati. 2.2.1.1.3. Anulomapuggalokāsa Yassa yattha rūpakkhandho uppajjati tassa tattha vedanākkhandho uppajjatīti? Asaññasattaṁ upapajjantānaṁ tesaṁ tattha rūpakkhandho uppajjati, no ca tesaṁ tattha vedanākkhandho uppajjati. Pañcavokāraṁ upapajjantānaṁ tesaṁ tattha rūpakkhandho ca uppajjati vedanākkhandho ca uppajjati. Yassa vā pana yattha vedanākkhandho uppajjati tassa tattha rūpakkhandho uppajjatīti? Arūpaṁ upapajjantānaṁ tesaṁ tattha vedanākkhandho uppajjati, no ca tesaṁ tattha rūpakkhandho uppajjati. Pañcavokāraṁ upapajjantānaṁ tesaṁ tattha vedanākkhandho ca uppajjati rūpakkhandho ca uppajjati. 2.2.1.1.4. Paccanīkapuggala Yassa rūpakkhandho nuppajjati tassa vedanākkhandho nuppajjatīti? Arūpaṁ upapajjantānaṁ tesaṁ rūpakkhandho nuppajjati, no ca tesaṁ vedanākkhandho nuppajjati. Sabbesaṁ cavantānaṁ tesaṁ rūpakkhandho ca nuppajjati vedanākkhandho ca nuppajjati. Yassa vā pana vedanākkhandho nuppajjati tassa rūpakkhandho nuppajjatīti?
