Yato vā pana avijjānusayaṁ pajahati tato mānānusayaṁ pajahatīti? Dukkhāya vedanāya tato avijjānusayaṁ pajahati, no ca tato mānānusayaṁ pajahati. Kāmadhātuyā dvīsu vedanāsu rūpadhātuyā arūpadhātuyā tato avijjānusayañca pajahati mānānusayañca pajahati. Yato diṭṭhānusayaṁ pajahati tato vicikicchānusayaṁ pajahatīti? Āmantā. Yato vā pana vicikicchānusayaṁ pajahati tato diṭṭhānusayaṁ pajahatīti? Āmantā …pe…. Yato vicikicchānusayaṁ pajahati tato bhavarāgānusayaṁ pajahatīti? Kāmadhātuyā tīsu vedanāsu tato vicikicchānusayaṁ pajahati, no ca tato bhavarāgānusayaṁ pajahati. Rūpadhātuyā arūpadhātuyā tato vicikicchānusayañca pajahati bhavarāgānusayañca pajahati. Yato vā pana bhavarāgānusayaṁ pajahati tato vicikicchānusayaṁ pajahatīti? Āmantā. Yato vicikicchānusayaṁ pajahati tato avijjānusayaṁ pajahatīti? Āmantā. Yato vā pana avijjānusayaṁ pajahati tato vicikicchānusayaṁ pajahatīti? Āmantā. Yato bhavarāgānusayaṁ pajahati tato avijjānusayaṁ pajahatīti? Āmantā. Yato vā pana avijjānusayaṁ pajahati tato bhavarāgānusayaṁ pajahatīti? Kāmadhātuyā tīsu vedanāsu tato avijjānusayaṁ pajahati no ca tato bhavarāgānusayaṁ pajahati. Rūpadhātuyā arūpadhātuyā tato avijjānusayañca pajahati bhavarāgānusayañca pajahati. (Ekamūlakaṁ.)