Ye rūpāvacaraṁ arūpāvacaraṁ upapajjitvā parinibbāyissanti tesaṁ dhammāyatanaṁ uppajjissati, no ca tesaṁ ghānāyatanaṁ uppajjissati. Itaresaṁ tesaṁ dhammāyatanañca uppajjissati ghānāyatanañca uppajjissati. (Ghānāyatanamūlakaṁ.) Yassa rūpāyatanaṁ uppajjissati tassa manāyatanaṁ …pe… dhammāyatanaṁ uppajjissatīti? Āmantā. Yassa vā pana dhammāyatanaṁ uppajjissati tassa rūpāyatanaṁ uppajjissatīti? Ye arūpaṁ upapajjitvā parinibbāyissanti tesaṁ dhammāyatanaṁ uppajjissati, no ca tesaṁ rūpāyatanaṁ uppajjissati. Itaresaṁ tesaṁ dhammāyatanañca uppajjissati rūpāyatanañca uppajjissati. (Rūpāyatanamūlakaṁ.) Yassa manāyatanaṁ uppajjissati tassa dhammāyatanaṁ uppajjissatīti? Āmantā. Yassa vā pana dhammāyatanaṁ uppajjissati tassa manāyatanaṁ uppajjissatīti? Āmantā. (Manāyatanamūlakaṁ.) 3.2.1.3.2. Anulomaokāsa Yattha cakkhāyatanaṁ uppajjissati …pe…. 3.2.1.3.3. Anulomapuggalokāsa Yassa yattha cakkhāyatanaṁ uppajjissati tassa tattha sotāyatanaṁ uppajjissatīti? Āmantā. Yassa vā pana yattha sotāyatanaṁ uppajjissati tassa tattha cakkhāyatanaṁ uppajjissatīti? Āmantā. Yassa yattha cakkhāyatanaṁ uppajjissati tassa tattha ghānāyatanaṁ uppajjissatīti? Rūpāvacarānaṁ tesaṁ tattha cakkhāyatanaṁ uppajjissati, no ca tesaṁ tattha ghānāyatanaṁ uppajjissati. Kāmāvacarānaṁ tesaṁ tattha cakkhāyatanañca uppajjissati ghānāyatanañca uppajjissati. Yassa vā pana yattha ghānāyatanaṁ uppajjissati tassa tattha cakkhāyatanaṁ uppajjissatīti? Āmantā.