Kāmadhātuyā tīsu vedanāsu tato bhavarāgānusayaṁ nappajahati, no ca tato vicikicchānusayaṁ nappajahati; apariyāpanne tato bhavarāgānusayañca nappajahati vicikicchānusayañca nappajahati. Yato vicikicchānusayaṁ nappajahati tato avijjānusayaṁ nappajahatīti? Āmantā. Yato vā pana avijjānusayaṁ nappajahati tato vicikicchānusayaṁ nappajahatīti? Āmantā. Yato bhavarāgānusayaṁ nappajahati tato avijjānusayaṁ nappajahatīti? Kāmadhātuyā tīsu vedanāsu tato bhavarāgānusayaṁ nappajahati, no ca tato avijjānusayaṁ nappajahati. Apariyāpanne tato bhavarāgānusayañca nappajahati avijjānusayañca nappajahati. Yato vā pana avijjānusayaṁ nappajahati tato bhavarāgānusayaṁ nappajahatīti? Āmantā. (Ekamūlakaṁ.) Yato kāmarāgānusayañca paṭighānusayañca nappajahati tato mānānusayaṁ nappajahatīti? Rūpadhātuyā arūpadhātuyā tato kāmarāgānusayañca paṭighānusayañca nappajahati, no ca tato mānānusayaṁ nappajahati. Apariyāpanne tato kāmarāgānusayañca paṭighānusayañca nappajahati mānānusayañca nappajahati. Yato vā pana mānānusayaṁ nappajahati tato kāmarāgānusayañca paṭighānusayañca nappajahatīti? Dukkhāya vedanāya tato mānānusayañca kāmarāgānusayañca nappajahati, no ca tato paṭighānusayaṁ nappajahati. Apariyāpanne tato mānānusayañca nappajahati kāmarāgānusayañca paṭighānusayañca nappajahati. Yato kāmarāgānusayañca paṭighānusayañca nappajahati tato diṭṭhānusayaṁ …pe… vicikicchānusayaṁ nappajahatīti?