Pacchimabhavikānaṁ ye ca arūpaṁ upapajjitvā parinibbāyissanti tesaṁ ghānāyatanaṁ uppajjittha, no ca tesaṁ rūpāyatanaṁ uppajjissati. Itaresaṁ tesaṁ ghānāyatanañca uppajjittha rūpāyatanañca uppajjissati. Yassa vā pana …pe… uppajjitthāti? Āmantā. Yassa ghānāyatanaṁ uppajjittha tassa manāyatanaṁ …pe… dhammāyatanaṁ uppajjissatīti? Pacchimabhavikānaṁ tesaṁ ghānāyatanaṁ uppajjittha, no ca tesaṁ dhammāyatanaṁ uppajjissati. Itaresaṁ tesaṁ ghānāyatanañca uppajjittha dhammāyatanañca uppajjissati. Yassa vā pana dhammāyatanaṁ …pe… uppajjitthāti? Āmantā. Yassa rūpāyatanaṁ uppajjittha tassa manāyatanaṁ …pe… dhammāyatanaṁ uppajjissatīti? Pacchimabhavikānaṁ tesaṁ rūpāyatanaṁ uppajjittha, no ca tesaṁ dhammāyatanaṁ uppajjissati. Itaresaṁ tesaṁ rūpāyatanañca uppajjittha dhammāyatanañca uppajjissati. Yassa vā pana …pe… uppajjitthāti? Āmantā. Yassa manāyatanaṁ uppajjittha tassa dhammāyatanaṁ uppajjissatīti? Pacchimabhavikānaṁ tesaṁ manāyatanaṁ uppajjittha, no ca tesaṁ dhammāyatanaṁ uppajjissati. Itaresaṁ tesaṁ manāyatanañca uppajjittha dhammāyatanañca uppajjissati. Yassa vā pana dhammāyatanaṁ uppajjissati tassa manāyatanaṁ uppajjitthāti? Āmantā. 3.2.1.6.2. Anulomaokāsa