Yassa vā pana yattha dhammāyatanaṁ nuppajjissati tassa tattha rūpāyatanaṁ nuppajjatīti? Pacchimabhavikānaṁ pañcavokāraṁ upapajjantānaṁ tesaṁ tattha dhammāyatanaṁ nuppajjissati, no ca tesaṁ tattha rūpāyatanaṁ nuppajjati. Pañcavokāre parinibbantānaṁ arūpe pacchimabhavikānaṁ tesaṁ tattha dhammāyatanañca nuppajjissati rūpāyatanañca nuppajjati. (Rūpāyatanamūlakaṁ.) Yassa yattha manāyatanaṁ nuppajjati tassa tattha dhammāyatanaṁ nuppajjissatīti? Sabbesaṁ cavantānaṁ acittakānaṁ upapajjantānaṁ tesaṁ tattha manāyatanaṁ nuppajjati, no ca tesaṁ tattha dhammāyatanaṁ nuppajjissati. Parinibbantānaṁ tesaṁ tattha manāyatanañca nuppajjati dhammāyatanañca nuppajjissati. Yassa vā pana yattha dhammāyatanaṁ nuppajjissati tassa tattha manāyatanaṁ nuppajjatīti? Pacchimabhavikānaṁ upapajjantānaṁ tesaṁ tattha dhammāyatanaṁ nuppajjissati, no ca tesaṁ tattha manāyatanaṁ nuppajjati. Parinibbantānaṁ tesaṁ tattha dhammāyatanañca nuppajjissati manāyatanañca nuppajjati. (Manāyatanamūlakaṁ.) 3.2.1.6. Atītānāgatavāra 3.2.1.6.1. Anulomapuggala Yassa cakkhāyatanaṁ uppajjittha tassa sotāyatanaṁ uppajjissatīti? Pacchimabhavikānaṁ ye ca arūpaṁ upapajjitvā parinibbāyissanti tesaṁ cakkhāyatanaṁ uppajjittha, no ca tesaṁ sotāyatanaṁ uppajjissati. Itaresaṁ tesaṁ cakkhāyatanañca uppajjittha sotāyatanañca uppajjissati.