Yassa vā pana yattha vedanākkhandho nirujjhissati tassa tattha rūpakkhandho uppajjitthāti? Suddhāvāsaṁ upapajjantānaṁ arūpānaṁ tesaṁ tattha vedanākkhandho nirujjhissati, no ca tesaṁ tattha rūpakkhandho uppajjittha. Itaresaṁ pañcavokārānaṁ tesaṁ tattha vedanākkhandho ca nirujjhissati rūpakkhandho ca uppajjittha. Yassa yattha vedanākkhandho uppajjittha tassa tattha saññākkhandho nirujjhissatīti? Parinibbantānaṁ tesaṁ tattha vedanākkhandho uppajjittha, no ca tesaṁ tattha saññākkhandho nirujjhissati. Itaresaṁ catuvokārānaṁ pañcavokārānaṁ tesaṁ tattha vedanākkhandho ca uppajjittha saññākkhandho ca nirujjhissati. Yassa vā pana yattha saññākkhandho nirujjhissati tassa tattha vedanākkhandho uppajjitthāti? Suddhāvāsaṁ upapajjantānaṁ tesaṁ tattha saññākkhandho nirujjhissati, no ca tesaṁ tattha vedanākkhandho uppajjittha. Itaresaṁ catuvokārānaṁ pañcavokārānaṁ tesaṁ tattha saññākkhandho ca nirujjhissati vedanākkhandho ca uppajjittha. 2.2.3.6.4. Paccanīkapuggala Yassa rūpakkhandho nuppajjittha tassa vedanākkhandho na nirujjhissatīti? Natthi. Yassa vā pana vedanākkhandho na nirujjhissati tassa rūpakkhandho nuppajjitthāti? Uppajjittha. Yassa vedanākkhandho nuppajjittha tassa saññākkhandho na nirujjhissatīti? Natthi.