Sabbesaṁ cavantānaṁ tesaṁ rūpāyatanaṁ nuppajjati, no ca tesaṁ dhammāyatanaṁ na nirujjhati. Arūpakānaṁ upapajjantānaṁ tesaṁ rūpāyatanañca nuppajjati dhammāyatanañca na nirujjhati. Yassa vā pana dhammāyatanaṁ na nirujjhati tassa rūpāyatanaṁ nuppajjatīti? Sarūpakānaṁ upapajjantānaṁ tesaṁ dhammāyatanaṁ na nirujjhati, no ca tesaṁ rūpāyatanaṁ nuppajjati. Arūpakānaṁ upapajjantānaṁ tesaṁ dhammāyatanañca na nirujjhati rūpāyatanañca nuppajjati. (Rūpāyatanamūlakaṁ.) Yassa manāyatanaṁ nuppajjati tassa dhammāyatanaṁ na nirujjhatīti? Sabbesaṁ cavantānaṁ tesaṁ manāyatanaṁ nuppajjati, no ca tesaṁ dhammāyatanaṁ na nirujjhati. Acittakānaṁ upapajjantānaṁ tesaṁ manāyatanañca nuppajjati dhammāyatanañca na nirujjhati. Yassa vā pana dhammāyatanaṁ na nirujjhati tassa manāyatanaṁ nuppajjatīti? Sacittakānaṁ upapajjantānaṁ tesaṁ dhammāyatanaṁ na nirujjhati, no ca tesaṁ manāyatanaṁ nuppajjati. Acittakānaṁ upapajjantānaṁ tesaṁ dhammāyatanañca na nirujjhati manāyatanañca nuppajjati. 3.2.3.1.5. Paccanīkaokāsa Yattha cakkhāyatanaṁ nuppajjati …pe…. 3.2.3.1.6. Paccanīkapuggalokāsa Yassa yattha cakkhāyatanaṁ nuppajjati …pe…. (Yassakampi yassayatthakampi sadisaṁ.) 3.2.3.2. Atītavāra 3.2.3.2.1. Anulomapuggala Yassa cakkhāyatanaṁ uppajjittha tassa sotāyatanaṁ nirujjhitthāti? Āmantā. Yassa vā pana sotāyatanaṁ nirujjhittha tassa cakkhāyatanaṁ uppajjitthāti? Āmantā …pe….