Yassa yattha cakkhāyatanaṁ nuppajjissati tassa tattha dhammāyatanaṁ na nirujjhissatīti? Pacchimabhavikānaṁ pañcavokāraṁ upapajjantānaṁ asaññasattānaṁ arūpānaṁ tesaṁ tattha cakkhāyatanaṁ nuppajjissati, no ca tesaṁ tattha dhammāyatanaṁ na nirujjhissati. Parinibbantānaṁ tesaṁ tattha cakkhāyatanañca nuppajjissati dhammāyatanañca na nirujjhissati. Yassa vā pana yattha …pe… ? Āmantā. (Cakkhāyatanamūlakaṁ.) Yassa yattha ghānāyatanaṁ nuppajjissati tassa tattha rūpāyatanaṁ na nirujjhissatīti? Pacchimabhavikānaṁ kāmāvacaraṁ upapajjantānaṁ rūpāvacarānaṁ tesaṁ tattha ghānāyatanaṁ nuppajjissati, no ca tesaṁ tattha rūpāyatanaṁ na nirujjhissati. Pañcavokāre parinibbantānaṁ arūpānaṁ tesaṁ tattha ghānāyatanañca nuppajjissati rūpāyatanañca na nirujjhissati. Yassa vā pana yattha …pe… ? Āmantā. Yassa yattha ghānāyatanaṁ nuppajjissati tassa tattha manāyatanaṁ na nirujjhissatīti? Pacchimabhavikānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha ghānāyatanaṁ nuppajjissati, no ca tesaṁ tattha manāyatanaṁ na nirujjhissati. Parinibbantānaṁ asaññasattānaṁ tesaṁ tattha ghānāyatanañca nuppajjissati manāyatanañca na nirujjhissati. Yassa vā pana yattha …pe… ? Āmantā. Yassa yattha ghānāyatanaṁ nuppajjissati tassa tattha dhammāyatanaṁ na nirujjhissatīti?