Yassa cakkhāyatanaṁ na nirujjhissati tassa sotāyatanaṁ na nirujjhissatīti? Āmantā. Yassa vā pana sotāyatanaṁ na nirujjhissati tassa cakkhāyatanaṁ na nirujjhissatīti? Āmantā. Yassa cakkhāyatanaṁ na nirujjhissati tassa ghānāyatanaṁ na nirujjhissatīti? Āmantā. Yassa vā pana ghānāyatanaṁ na nirujjhissati tassa cakkhāyatanaṁ na nirujjhissatīti? Pacchimabhavikānaṁ rūpāvacaraṁ upapajjantānaṁ ye ca rūpāvacaraṁ upapajjitvā parinibbāyissanti tesaṁ cavantānaṁ tesaṁ ghānāyatanaṁ na nirujjhissati, no ca tesaṁ cakkhāyatanaṁ na nirujjhissati. Pañcavokāre parinibbantānaṁ arūpe pacchimabhavikānaṁ ye ca arūpaṁ upapajjitvā parinibbāyissanti tesaṁ cavantānaṁ tesaṁ ghānāyatanañca na nirujjhissati cakkhāyatanañca na nirujjhissati. Yassa cakkhāyatanaṁ na nirujjhissati tassa rūpāyatanaṁ na nirujjhissatīti? Āmantā. Yassa vā pana rūpāyatanaṁ na nirujjhissati tassa cakkhāyatanaṁ na nirujjhissatīti? Āmantā. Yassa cakkhāyatanaṁ na nirujjhissati tassa manāyatanaṁ …pe… dhammāyatanaṁ na nirujjhissatīti? Pacchimabhavikānaṁ arūpaṁ upapajjantānaṁ ye ca arūpaṁ upapajjitvā parinibbāyissanti tesaṁ cavantānaṁ tesaṁ cakkhāyatanaṁ na nirujjhissati, no ca tesaṁ dhammāyatanaṁ na nirujjhissati. Parinibbantānaṁ tesaṁ cakkhāyatanañca na nirujjhissati dhammāyatanañca na nirujjhissati.