Rūpāyatanaṁ ṭhapetvā avasesaṁ rūpaṁ, na rūpāyatanaṁ. Rūpāyatanaṁ rūpañceva rūpāyatanañca. Rūpāyatanaṁ rūpanti? Āmantā. Saddo saddāyatananti? Āmantā. Saddāyatanaṁ saddoti? Āmantā. Gandho gandhāyatananti? Sīlagandho samādhigandho paññāgandho gandho, na gandhāyatanaṁ. Gandhāyatanaṁ gandho ceva gandhāyatanañca. Gandhāyatanaṁ gandhoti? Āmantā. Raso rasāyatananti? Attharaso dhammaraso vimuttiraso raso, na rasāyatanaṁ. Rasāyatanaṁ raso ceva rasāyatanañca. Rasāyatanaṁ rasoti? Āmantā. Phoṭṭhabbo phoṭṭhabbāyatananti? Āmantā. Phoṭṭhabbāyatanaṁ phoṭṭhabboti? Āmantā. Mano manāyatananti? Āmantā. Manāyatanaṁ manoti? Āmantā. Dhammo dhammāyatananti? Dhammāyatanaṁ ṭhapetvā avaseso dhammo, na dhammāyatanaṁ. Dhammāyatanaṁ dhammo ceva dhammāyatanañca. Dhammāyatanaṁ dhammoti? Āmantā. 3.1.2.1.2. Paccanīka Na cakkhu na cakkhāyatananti? Āmantā. Na cakkhāyatanaṁ na cakkhūti? Dibbacakkhu paññācakkhu na cakkhāyatanaṁ, cakkhu. Cakkhuñca cakkhāyatanañca ṭhapetvā avasesaṁ na ceva cakkhu na ca cakkhāyatanaṁ. Na sotaṁ na sotāyatananti? Āmantā. Na sotāyatanaṁ na sotanti? Dibbasotaṁ taṇhāsotaṁ na sotāyatanaṁ, sotaṁ. Sotañca sotāyatanañca ṭhapetvā avasesaṁ na ceva sotaṁ na ca sotāyatanaṁ. Na ghānaṁ na ghānāyatananti? Āmantā. Na ghānāyatanaṁ na ghānanti? Āmantā. Na jivhā na jivhāyatananti? Āmantā.