Yassa cittassa anantarā aggamaggaṁ paṭilabhissanti tassa cittassa bhaṅgakkhaṇe ye caññe maggaṁ paṭilabhissanti tesaṁ cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ maggasaccaṁ uppajjissati, no ca tesaṁ dukkhasaccaṁ uppajjati. Yassa cittassa anantarā aggamaggaṁ paṭilabhissanti tassa cittassa uppādakkhaṇe ye caññe maggaṁ paṭilabhissanti tesaṁ upapajjantānaṁ pavatte cittassa uppādakkhaṇe tesaṁ maggasaccañca uppajjissati dukkhasaccañca uppajjati. Yassa samudayasaccaṁ uppajjati tassa maggasaccaṁ uppajjissatīti? Ye puthujjanā maggaṁ na paṭilabhissanti tesaṁ taṇhāya uppādakkhaṇe tesaṁ samudayasaccaṁ uppajjati, no ca tesaṁ maggasaccaṁ uppajjissati. Ye maggaṁ paṭilabhissanti tesaṁ taṇhāya uppādakkhaṇe tesaṁ samudayasaccañca uppajjati maggasaccañca uppajjissati. Yassa vā pana maggasaccaṁ uppajjissati tassa samudayasaccaṁ uppajjatīti? Yassa cittassa anantarā aggamaggaṁ paṭilabhissanti ye caññe maggaṁ paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne nirodhasamāpannānaṁ asaññasattānaṁ tesaṁ maggasaccaṁ uppajjissati, no ca tesaṁ samudayasaccaṁ uppajjati. Ye maggaṁ paṭilabhissanti tesaṁ taṇhāya uppādakkhaṇe tesaṁ maggasaccañca uppajjissati samudayasaccañca uppajjati. 5.2.1.5.2. Anulomaokāsa Yattha dukkhasaccaṁ uppajjati …pe… (Yatthakampi yassayatthakasadisaṁ kātabbaṁ.) 5.2.1.5.3. Anulomapuggalokāsa