Yassa vacīsaṅkhāro na nirujjhati tassa cittasaṅkhāro na nirujjhissatīti? Sabbesaṁ cittassa uppādakkhaṇe vinā vitakkavicārehi cittassa bhaṅgakkhaṇe nirodhasamāpannānaṁ asaññasattānaṁ tesaṁ vacīsaṅkhāro na nirujjhati, no ca tesaṁ cittasaṅkhāro na nirujjhissati. Avitakkaavicārapacchimacittassa bhaṅgakkhaṇe tesaṁ vacīsaṅkhāro ca na nirujjhati cittasaṅkhāro ca na nirujjhissati. Yassa vā pana cittasaṅkhāro na nirujjhissati tassa vacīsaṅkhāro na nirujjhatīti? Savitakkasavicārapacchimacittassa bhaṅgakkhaṇe tesaṁ cittasaṅkhāro na nirujjhissati, no ca tesaṁ vacīsaṅkhāro na nirujjhati. Avitakkaavicārapacchimacittassa bhaṅgakkhaṇe tesaṁ cittasaṅkhāro ca na nirujjhissati vacīsaṅkhāro ca na nirujjhati. 6.2.2.5.5. Paccanīkaokāsa Yattha kāyasaṅkhāro na nirujjhati …pe…. 6.2.2.5.6. Paccanīkapuggalokāsa Yassa yattha kāyasaṅkhāro na nirujjhati tassa tattha vacīsaṅkhāro na nirujjhissatīti?