Arūpānaṁ tesaṁ tattha rūpakkhandho na nirujjhittha, no ca tesaṁ tattha vedanākkhandho na nirujjhittha. Suddhāvāsānaṁ tesaṁ tattha rūpakkhandho ca na nirujjhittha vedanākkhandho ca na nirujjhittha. Yassa vā pana yattha vedanākkhandho na nirujjhittha tassa tattha rūpakkhandho na nirujjhitthāti? Asaññasattānaṁ tesaṁ tattha vedanākkhandho na nirujjhittha, no ca tesaṁ tattha rūpakkhandho na nirujjhittha. Suddhāvāsānaṁ tesaṁ tattha vedanākkhandho ca na nirujjhittha rūpakkhandho ca na nirujjhittha. 2.2.2.3. Anāgatavāra 2.2.2.3.1. Anulomapuggala Yassa rūpakkhandho nirujjhissati tassa vedanākkhandho nirujjhissatīti? Āmantā. Yassa vā pana vedanākkhandho nirujjhissati tassa rūpakkhandho nirujjhissatīti? Pacchimabhavikānaṁ arūpaṁ upapajjantānaṁ ye ca arūpaṁ upapajjitvā parinibbāyissanti tesaṁ cavantānaṁ tesaṁ vedanākkhandho nirujjhissati, no ca tesaṁ rūpakkhandho nirujjhissati. Itaresaṁ tesaṁ vedanākkhandho ca nirujjhissati rūpakkhandho ca nirujjhissati. 2.2.2.3.2. Anulomaokāsa Yattha rūpakkhandho nirujjhissati tattha vedanākkhandho nirujjhissatīti? Asaññasatte tattha rūpakkhandho nirujjhissati, no ca tattha vedanākkhandho nirujjhissati. Pañcavokāre tattha rūpakkhandho ca nirujjhissati vedanākkhandho ca nirujjhissati. Yattha vā pana vedanākkhandho nirujjhissati tattha rūpakkhandho nirujjhissatīti?