Yassa vā pana maggasaccaṁ nuppajjissati tassa samudayasaccaṁ nuppajjissatīti? Ye puthujjanā maggaṁ na paṭilabhissanti tesaṁ maggasaccaṁ nuppajjissati, no ca tesaṁ samudayasaccaṁ nuppajjissati. Aggamaggasamaṅgīnaṁ arahantānaṁ tesaṁ maggasaccañca nuppajjissati samudayasaccañca nuppajjissati. 5.2.1.3.5. Paccanīkaokāsa Yattha dukkhasaccaṁ nuppajjissati …pe…. 5.2.1.3.6. Paccanīkapuggalokāsa Yassa yattha dukkhasaccaṁ nuppajjissati tassa tattha samudayasaccaṁ nuppajjissatīti? Āmantā. Yassa vā pana yattha samudayasaccaṁ nuppajjissati tassa tattha dukkhasaccaṁ nuppajjissatīti? Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti asaññasattānaṁ tesaṁ tattha samudayasaccaṁ nuppajjissati, no ca tesaṁ tattha dukkhasaccaṁ nuppajjissati. Pacchimacittasamaṅgīnaṁ tesaṁ tattha samudayasaccañca nuppajjissati dukkhasaccañca nuppajjissati. Yassa yattha dukkhasaccaṁ nuppajjissati tassa tattha maggasaccaṁ nuppajjissatīti? Āmantā. Yassa vā pana yattha maggasaccaṁ nuppajjissati tassa tattha dukkhasaccaṁ nuppajjissatīti? Aggamaggasamaṅgīnaṁ arahantānaṁ ye ca puthujjanā maggaṁ na paṭilabhissanti āpāyikānaṁ asaññasattānaṁ tesaṁ tattha maggasaccaṁ nuppajjissati, no ca tesaṁ tattha dukkhasaccaṁ nuppajjissati. Pacchimacittasamaṅgīnaṁ tesaṁ tattha maggasaccañca nuppajjissati dukkhasaccañca nuppajjissati.