Suddhāvāsaṁ upapajjantānaṁ tesaṁ tattha dhammāyatanaṁ nuppajjittha, no ca tesaṁ tattha cakkhāyatanaṁ nuppajjati. Suddhāvāse parinibbantānaṁ tesaṁ tattha dhammāyatanañca nuppajjittha cakkhāyatanañca nuppajjati. (Cakkhāyatanamūlakaṁ.) Yassa yattha ghānāyatanaṁ nuppajjati tassa tattha rūpāyatanaṁ nuppajjitthāti? Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ tesaṁ tattha ghānāyatanaṁ nuppajjati, no ca tesaṁ tattha rūpāyatanaṁ nuppajjittha. Suddhāvāsānaṁ arūpānaṁ tesaṁ tattha ghānāyatanañca nuppajjati rūpāyatanañca nuppajjittha. Yassa vā pana yattha rūpāyatanaṁ nuppajjittha tassa tattha ghānāyatanaṁ nuppajjatīti? Āmantā. Yassa yattha ghānāyatanaṁ nuppajjati tassa tattha manāyatanaṁ nuppajjitthāti? Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha ghānāyatanaṁ nuppajjati, no ca tesaṁ tattha manāyatanaṁ nuppajjittha. Suddhāvāsānaṁ asaññasattānaṁ tesaṁ tattha ghānāyatanañca nuppajjati manāyatanañca nuppajjittha. Yassa vā pana yattha manāyatanaṁ nuppajjittha tassa tattha ghānāyatanaṁ nuppajjatīti? Āmantā. Yassa yattha ghānāyatanaṁ nuppajjati tassa tattha dhammāyatanaṁ nuppajjitthāti?