Yassa cakkhāyatanaṁ nuppajjissati tassa rūpāyatanaṁ nuppajjissatīti? Āmantā. Yassa vā pana rūpāyatanaṁ nuppajjissati tassa cakkhāyatanaṁ nuppajjissatīti? Āmantā. Yassa cakkhāyatanaṁ nuppajjissati tassa manāyatanaṁ …pe… dhammāyatanaṁ nuppajjissatīti? Ye arūpaṁ upapajjitvā parinibbāyissanti tesaṁ cakkhāyatanaṁ nuppajjissati, no ca tesaṁ dhammāyatanaṁ nuppajjissati. Pacchimabhavikānaṁ tesaṁ cakkhāyatanañca nuppajjissati dhammāyatanañca nuppajjissati. Yassa vā pana dhammāyatanaṁ nuppajjissati tassa cakkhāyatanaṁ nuppajjissatīti? Āmantā. (Cakkhāyatanamūlakaṁ.) Yassa ghānāyatanaṁ nuppajjissati tassa rūpāyatanaṁ nuppajjissatīti? Ye rūpāvacaraṁ upapajjitvā parinibbāyissanti tesaṁ ghānāyatanaṁ nuppajjissati, no ca tesaṁ rūpāyatanaṁ nuppajjissati. Pacchimabhavikānaṁ ye ca arūpaṁ upapajjitvā parinibbāyissanti tesaṁ ghānāyatanañca nuppajjissati rūpāyatanañca nuppajjissati. Yassa vā pana rūpāyatanaṁ nuppajjissati tassa ghānāyatanaṁ nuppajjissatīti? Āmantā. Yassa ghānāyatanaṁ nuppajjissati tassa manāyatanaṁ …pe… dhammāyatanaṁ nuppajjissatīti? Ye rūpāvacaraṁ arūpāvacaraṁ upapajjitvā parinibbāyissanti tesaṁ ghānāyatanaṁ nuppajjissati, no ca tesaṁ dhammāyatanaṁ nuppajjissati. Pacchimabhavikānaṁ tesaṁ ghānāyatanañca nuppajjissati dhammāyatanañca nuppajjissati. Yassa vā pana dhammāyatanaṁ nuppajjissati tassa ghānāyatanaṁ nuppajjissatīti? Āmantā. (Ghānāyatanamūlakaṁ.)