Yassa yattha rūpakkhandho uppajjati tassa tattha vedanākkhandho uppajjissatīti? Pacchimabhavikānaṁ pañcavokāraṁ upapajjantānaṁ asaññasattaṁ upapajjantānaṁ tesaṁ tattha rūpakkhandho uppajjati, no ca tesaṁ tattha vedanākkhandho uppajjissati. Itaresaṁ pañcavokāraṁ upapajjantānaṁ tesaṁ tattha rūpakkhandho ca uppajjati vedanākkhandho ca uppajjissati. Yassa vā pana yattha vedanākkhandho uppajjissati tassa tattha rūpakkhandho uppajjatīti? Pañcavokārā cavantānaṁ arūpānaṁ tesaṁ tattha vedanākkhandho uppajjissati, no ca tesaṁ tattha rūpakkhandho uppajjati. Pañcavokāraṁ upapajjantānaṁ tesaṁ tattha vedanākkhandho ca uppajjissati rūpakkhandho ca uppajjati. Yassa yattha vedanākkhandho uppajjati tassa tattha saññākkhandho uppajjissatīti? Pacchimabhavikānaṁ upapajjantānaṁ tesaṁ tattha vedanākkhandho uppajjati, no ca tesaṁ tattha saññākkhandho uppajjissati. Itaresaṁ catuvokāraṁ pañcavokāraṁ upapajjantānaṁ tesaṁ tattha vedanākkhandho ca uppajjati saññākkhandho ca uppajjissati. Yassa vā pana yattha saññākkhandho uppajjissati tassa tattha vedanākkhandho uppajjatīti? Catuvokārā pañcavokārā cavantānaṁ tesaṁ tattha saññākkhandho uppajjissati, no ca tesaṁ tattha vedanākkhandho uppajjati. Catuvokāraṁ pañcavokāraṁ upapajjantānaṁ tesaṁ tattha saññākkhandho ca uppajjissati vedanākkhandho ca uppajjati. 2.2.1.5.4. Paccanīkapuggala