Yassa vedanākkhandho nuppajjati tassa saññākkhandho na nirujjhatīti? Catuvokārā pañcavokārā cavantānaṁ tesaṁ vedanākkhandho nuppajjati, no ca tesaṁ saññākkhandho na nirujjhati. Asaññasattānaṁ tesaṁ vedanākkhandho ca nuppajjati saññākkhandho ca na nirujjhati. Yassa vā pana saññākkhandho na nirujjhati tassa vedanākkhandho nuppajjatīti? Catuvokāraṁ pañcavokāraṁ upapajjantānaṁ tesaṁ saññākkhandho na nirujjhati, no ca tesaṁ vedanākkhandho nuppajjati. Asaññasattānaṁ tesaṁ saññākkhandho ca na nirujjhati vedanākkhandho ca nuppajjati. 2.2.3.1.5. Paccanīkaokāsa Yattha rūpakkhandho nuppajjati tattha vedanākkhandho na nirujjhatīti? Nirujjhati. Yattha vā pana vedanākkhandho na nirujjhati tattha rūpakkhandho nuppajjatīti? Uppajjati. Yattha vedanākkhandho nuppajjati tattha saññākkhandho na nirujjhatīti? Āmantā. Yattha vā pana saññākkhandho na nirujjhati tattha vedanākkhandho nuppajjatīti? Āmantā. 2.2.3.1.6. Paccanīkapuggalokāsa Yassa yattha rūpakkhandho nuppajjati tassa tattha vedanākkhandho na nirujjhatīti? Catuvokārā pañcavokārā cavantānaṁ tesaṁ tattha rūpakkhandho nuppajjati, no ca tesaṁ tattha vedanākkhandho na nirujjhati. Arūpaṁ upapajjantānaṁ asaññasattā cavantānaṁ tesaṁ tattha rūpakkhandho ca nuppajjati vedanākkhandho ca na nirujjhati.