Yo vā pana vicikicchānusayaṁ parijānāti so kāmarāgānusayañca paṭighānusayañca parijānātīti? Tadekaṭṭhaṁ parijānāti. Yo kāmarāgānusayañca paṭighānusayañca parijānāti so bhavarāgānusayaṁ …pe… avijjānusayaṁ parijānātīti? Tadekaṭṭhaṁ parijānāti. Yo vā pana avijjānusayaṁ parijānāti so kāmarāgānusayañca paṭighānusayañca parijānātīti? No. (Dukamūlakaṁ.) Yo kāmarāgānusayañca paṭighānusayañca mānānusayañca parijānāti so diṭṭhānusayaṁ …pe… vicikicchānusayaṁ parijānātīti? Natthi. Yo vā pana vicikicchānusayaṁ parijānāti so kāmarāgānusayañca paṭighānusayañca mānānusayañca parijānātīti? Tadekaṭṭhaṁ parijānāti. Yo kāmarāgānusayañca paṭighānusayañca mānānusayañca parijānāti so bhavarāgānusayaṁ …pe… avijjānusayaṁ parijānātīti? Natthi. Yo vā pana avijjānusayaṁ parijānāti so kāmarāgānusayañca paṭighānusayañca mānānusayañca parijānātīti? Mānānusayaṁ parijānāti. (Tikamūlakaṁ.) Yo kāmarāgānusayañca paṭighānusayañca mānānusayañca diṭṭhānusayañca parijānāti so vicikicchānusayaṁ parijānātīti? Natthi. Yo vā pana vicikicchānusayaṁ parijānāti so kāmarāgānusayañca paṭighānusayañca mānānusayañca diṭṭhānusayañca parijānātīti? Diṭṭhānusayaṁ parijānāti kāmarāgānusayañca paṭighānusayañca mānānusayañca tadekaṭṭhaṁ parijānāti …pe…. (Catukkamūlakaṁ.)