Vedanākkhandho khandho ceva vedanākkhandho ca. Avasesā khandhā na vedanākkhandho. Saññā khandhoti? Āmantā. Khandhā saññākkhandhoti? Saññākkhandho khandho ceva saññākkhandho ca. Avasesā khandhā na saññākkhandho. Saṅkhārā khandhoti? Āmantā. Khandhā saṅkhārakkhandhoti? Saṅkhārakkhandho khandho ceva saṅkhārakkhandho ca. Avasesā khandhā na saṅkhārakkhandho. Viññāṇaṁ khandhoti? Āmantā. Khandhā viññāṇakkhandhoti? Viññāṇakkhandho khandho ceva viññāṇakkhandho ca. Avasesā khandhā na viññāṇakkhandho. 2.1.2.3.2. Paccanīka Na rūpaṁ na khandhoti? Rūpaṁ ṭhapetvā avasesā khandhā na rūpaṁ, khandhā. Rūpañca khandhe ca ṭhapetvā avasesā na ceva rūpaṁ na ca khandhā. Na khandhā na rūpakkhandhoti? Āmantā. Na vedanā na khandhoti? Vedanaṁ ṭhapetvā avasesā khandhā na vedanā, khandhā. Vedanañca khandhe ca ṭhapetvā avasesā na ceva vedanā na ca khandhā. Na khandhā na vedanākkhandhoti? Āmantā. Na saññā na khandhoti? Saññaṁ ṭhapetvā avasesā khandhā na saññā, khandhā. Saññañca khandhe ca ṭhapetvā avasesā na ceva saññā na ca khandhā. Na khandhā na saññākkhandhoti? Āmantā.