Sabbesaṁ cavantānaṁ tesaṁ cakkhāyatanaṁ nuppajjati, no ca tesaṁ dhammāyatanaṁ na nirujjhati. Acakkhukānaṁ upapajjantānaṁ tesaṁ cakkhāyatanañca nuppajjati dhammāyatanañca na nirujjhati. Yassa vā pana dhammāyatanaṁ na nirujjhati tassa cakkhāyatanaṁ nuppajjatīti? Sacakkhukānaṁ upapajjantānaṁ tesaṁ dhammāyatanaṁ na nirujjhati, no ca tesaṁ cakkhāyatanaṁ nuppajjati. Acakkhukānaṁ upapajjantānaṁ tesaṁ dhammāyatanañca na nirujjhati cakkhāyatanañca nuppajjati. (Cakkhāyatanamūlakaṁ.) Yassa ghānāyatanaṁ nuppajjati tassa rūpāyatanaṁ na nirujjhatīti? Sarūpakānaṁ cavantānaṁ tesaṁ ghānāyatanaṁ nuppajjati, no ca tesaṁ rūpāyatanaṁ na nirujjhati. Aghānakānaṁ upapajjantānaṁ arūpakānaṁ cavantānaṁ tesaṁ ghānāyatanañca nuppajjati rūpāyatanañca na nirujjhati. Yassa vā pana rūpāyatanaṁ na nirujjhati tassa ghānāyatanaṁ nuppajjatīti? Saghānakānaṁ upapajjantānaṁ tesaṁ rūpāyatanaṁ na nirujjhati, no ca tesaṁ ghānāyatanaṁ nuppajjati. Arūpakānaṁ cavantānaṁ aghānakānaṁ upapajjantānaṁ tesaṁ rūpāyatanañca na nirujjhati ghānāyatanañca nuppajjati. Yassa ghānāyatanaṁ nuppajjati tassa manāyatanaṁ na nirujjhatīti? Sacittakānaṁ cavantānaṁ tesaṁ ghānāyatanaṁ nuppajjati, no ca tesaṁ manāyatanaṁ na nirujjhati. Aghānakānaṁ upapajjantānaṁ acittakānaṁ cavantānaṁ tesaṁ ghānāyatanañca nuppajjati manāyatanañca na nirujjhati. Yassa vā pana manāyatanaṁ na nirujjhati tassa ghānāyatanaṁ nuppajjatīti?