Pacchimabhavikānaṁ pañcavokāraṁ upapajjantānaṁ arūpānaṁ tesaṁ tattha rūpakkhandho nuppajjissati, no ca tesaṁ tattha vedanākkhandho na nirujjhissati. Parinibbantānaṁ tesaṁ tattha rūpakkhandho ca nuppajjissati vedanākkhandho ca na nirujjhissati. Yassa vā pana yattha vedanākkhandho na nirujjhissati tassa tattha rūpakkhandho nuppajjissatīti? Asaññasattānaṁ tesaṁ tattha vedanākkhandho na nirujjhissati, no ca tesaṁ tattha rūpakkhandho nuppajjissati. Parinibbantānaṁ tesaṁ tattha vedanākkhandho ca na nirujjhissati rūpakkhandho ca nuppajjissati. Yassa yattha vedanākkhandho nuppajjissati tassa tattha saññākkhandho na nirujjhissatīti? Pacchimabhavikānaṁ upapajjantānaṁ tesaṁ tattha vedanākkhandho nuppajjissati, no ca tesaṁ tattha saññākkhandho na nirujjhissati. Parinibbantānaṁ asaññasattānaṁ tesaṁ tattha vedanākkhandho ca nuppajjissati saññākkhandho ca na nirujjhissati. Yassa vā pana yattha saññākkhandho na nirujjhissati tassa tattha vedanākkhandho nuppajjissatīti? Āmantā. 2.2.3.4. Paccuppannātītavāra 2.2.3.4.1. Anulomapuggala Yassa rūpakkhandho uppajjati tassa vedanākkhandho nirujjhitthāti? Āmantā. Yassa vā pana vedanākkhandho nirujjhittha tassa rūpakkhandho uppajjatīti? Sabbesaṁ cavantānaṁ arūpaṁ upapajjantānaṁ tesaṁ vedanākkhandho nirujjhittha, no ca tesaṁ rūpakkhandho uppajjati. Pañcavokāraṁ upapajjantānaṁ asaññasattaṁ upapajjantānaṁ tesaṁ vedanākkhandho ca nirujjhittha rūpakkhandho ca uppajjati …pe….