Sabbesaṁ upapajjantānaṁ aghānakānaṁ cavantānaṁ tesaṁ ghānāyatanaṁ na nirujjhati, no ca tesaṁ dhammāyatanaṁ na nirujjhissati. Rūpāvacare arūpāvacare parinibbantānaṁ tesaṁ ghānāyatanañca na nirujjhati dhammāyatanañca na nirujjhissati. Yassa vā pana dhammāyatanaṁ na nirujjhissati tassa ghānāyatanaṁ na nirujjhatīti? Kāmāvacare parinibbantānaṁ tesaṁ dhammāyatanaṁ na nirujjhissati, no ca tesaṁ ghānāyatanaṁ na nirujjhati. Rūpāvacare arūpāvacare parinibbantānaṁ tesaṁ dhammāyatanañca na nirujjhissati ghānāyatanañca na nirujjhati. Yassa rūpāyatanaṁ na nirujjhati tassa manāyatanaṁ …pe… dhammāyatanaṁ na nirujjhissatīti? Sabbesaṁ upapajjantānaṁ arūpakānaṁ cavantānaṁ tesaṁ rūpāyatanaṁ na nirujjhati, no ca tesaṁ dhammāyatanaṁ na nirujjhissati. Arūpe parinibbantānaṁ tesaṁ rūpāyatanañca na nirujjhati dhammāyatanañca na nirujjhissati. Yassa vā pana dhammāyatanaṁ na nirujjhissati tassa rūpāyatanaṁ na nirujjhatīti? Pañcavokāre parinibbantānaṁ tesaṁ dhammāyatanaṁ na nirujjhissati, no ca tesaṁ rūpāyatanaṁ na nirujjhati. Arūpe parinibbantānaṁ tesaṁ dhammāyatanañca na nirujjhissati rūpāyatanañca na nirujjhati. Yassa manāyatanaṁ na nirujjhati tassa dhammāyatanaṁ na nirujjhissatīti? Nirujjhissati. Yassa vā pana dhammāyatanaṁ na nirujjhissati tassa manāyatanaṁ na nirujjhatīti? Nirujjhati. 3.2.2.5.5. Paccanīkaokāsa Yattha cakkhāyatanaṁ na nirujjhati …pe…. 3.2.2.5.6. Paccanīkapuggalokāsa