Yassa vā pana yattha mānānusayo nānuseti tassa tattha kāmarāgānusayo nānusetīti? Āmantā. Yassa yattha kāmarāgānusayo nānuseti tassa tattha diṭṭhānusayo …pe… vicikicchānusayo nānusetīti? Puthujjanassa dukkhāya vedanāya rūpadhātuyā arūpadhātuyā tassa tattha kāmarāgānusayo nānuseti, no ca tassa tattha vicikicchānusayo nānuseti. Tasseva puggalassa apariyāpanne tassa tattha kāmarāgānusayo ca nānuseti vicikicchānusayo ca nānuseti. Dvinnaṁ puggalānaṁ sabbattha kāmarāgānusayo ca nānuseti vicikicchānusayo ca nānuseti. Yassa vā pana yattha vicikicchānusayo nānuseti tassa tattha kāmarāgānusayo nānusetīti? Dvinnaṁ puggalānaṁ kāmadhātuyā dvīsu vedanāsu tesaṁ tattha vicikicchānusayo nānuseti, no ca tesaṁ tattha kāmarāgānusayo nānuseti. Tesaññeva puggalānaṁ dukkhāya vedanāya rūpadhātuyā arūpadhātuyā apariyāpanne tesaṁ tattha vicikicchānusayo ca nānuseti kāmarāgānusayo ca nānuseti. Dvinnaṁ puggalānaṁ sabbattha vicikicchānusayo ca nānuseti kāmarāgānusayo ca nānuseti. Yassa yattha kāmarāgānusayo nānuseti tassa tattha bhavarāgānusayo nānusetīti?