Suddhāvāse parinibbantānaṁ tesaṁ tattha rūpāyatanaṁ nirujjhati, no ca tesaṁ tattha dhammāyatanaṁ nirujjhittha. Itaresaṁ sarūpakānaṁ cavantānaṁ tesaṁ tattha rūpāyatanañca nirujjhati dhammāyatanañca nirujjhittha. Yassa vā pana yattha dhammāyatanaṁ nirujjhittha tassa tattha rūpāyatanaṁ nirujjhatīti? Sabbesaṁ upapajjantānaṁ arūpakānaṁ cavantānaṁ tesaṁ tattha dhammāyatanaṁ nirujjhittha, no ca tesaṁ tattha rūpāyatanaṁ nirujjhati. Sarūpakānaṁ cavantānaṁ tesaṁ tattha dhammāyatanañca nirujjhittha rūpāyatanañca nirujjhati. (Rūpāyatanamūlakaṁ.) Yassa yattha manāyatanaṁ nirujjhati tassa tattha dhammāyatanaṁ nirujjhitthāti? Suddhāvāse parinibbantānaṁ tesaṁ tattha manāyatanaṁ nirujjhati, no ca tesaṁ tattha dhammāyatanaṁ nirujjhittha. Itaresaṁ sacittakānaṁ cavantānaṁ tesaṁ tattha manāyatanañca nirujjhati dhammāyatanañca nirujjhittha. Yassa vā pana yattha dhammāyatanaṁ nirujjhittha tassa tattha manāyatanaṁ nirujjhatīti? Sabbesaṁ upapajjantānaṁ acittakānaṁ cavantānaṁ tesaṁ tattha dhammāyatanaṁ nirujjhittha, no ca tesaṁ tattha manāyatanaṁ nirujjhati. Sacittakānaṁ cavantānaṁ tesaṁ tattha dhammāyatanañca nirujjhittha manāyatanañca nirujjhati. 3.2.2.4.4. Paccanīkapuggala Yassa cakkhāyatanaṁ na nirujjhati tassa sotāyatanaṁ na nirujjhitthāti? Nirujjhittha. Yassa vā pana sotāyatanaṁ na nirujjhittha tassa cakkhāyatanaṁ na nirujjhatīti? Natthi.