Kāmāvacaraṁ upapajjantānaṁ acakkhukānaṁ kāmāvacarā cavantānaṁ tesaṁ tattha cakkhāyatanaṁ na nirujjhati, no ca tesaṁ tattha ghānāyatanaṁ na nirujjhittha. Rūpāvacaraṁ upapajjantānaṁ asaññasattānaṁ arūpānaṁ tesaṁ tattha cakkhāyatanañca na nirujjhati ghānāyatanañca na nirujjhittha. Yassa vā pana yattha ghānāyatanaṁ na nirujjhittha tassa tattha cakkhāyatanaṁ na nirujjhatīti? Rūpāvacarā cavantānaṁ tesaṁ tattha ghānāyatanaṁ na nirujjhittha, no ca tesaṁ tattha cakkhāyatanaṁ na nirujjhati. Rūpāvacaraṁ upapajjantānaṁ asaññasattānaṁ arūpānaṁ tesaṁ tattha ghānāyatanañca na nirujjhittha cakkhāyatanañca na nirujjhati. Yassa yattha cakkhāyatanaṁ na nirujjhati tassa tattha rūpāyatanaṁ na nirujjhitthāti? Pañcavokāraṁ upapajjantānaṁ acakkhukānaṁ kāmāvacarā cavantānaṁ asaññasattānaṁ tesaṁ tattha cakkhāyatanaṁ na nirujjhati, no ca tesaṁ tattha rūpāyatanaṁ na nirujjhittha. Suddhāvāsaṁ upapajjantānaṁ arūpānaṁ tesaṁ tattha cakkhāyatanañca na nirujjhati rūpāyatanañca na nirujjhittha. Yassa vā pana yattha rūpāyatanaṁ na nirujjhittha tassa tattha cakkhāyatanaṁ na nirujjhatīti? Suddhāvāse parinibbantānaṁ tesaṁ tattha rūpāyatanaṁ na nirujjhittha, no ca tesaṁ tattha cakkhāyatanaṁ na nirujjhati. Suddhāvāsaṁ upapajjantānaṁ arūpānaṁ tesaṁ tattha rūpāyatanañca na nirujjhittha cakkhāyatanañca na nirujjhati. Yassa yattha cakkhāyatanaṁ na nirujjhati tassa tattha manāyatanaṁ na nirujjhitthāti?